کئچن هفته، جولای ۹-دان ۱۴-ه‌جن، هولند`ه یاخجی بیر سفریمزی اولدو ندا لا. بو سفرده آمستئردام`ین وریغژه بیلیوردو (Vrije Universiteit) لا آمستئردام بیلیوردونو گئتدیم. بیر توریست اولاراق دا شهرین بعضی جذاب یئرلرینه ده یولوموز توشدو؛ مثلا: فان قوخ موزه‌سی، مرکز ایستاسیون لا سو کانال‌لارینا. اوردا چکدیکیم عکیس‌لردن بیر اووجو آشاغیدا گلیر.
شهرین ۲۰-جی یوز-ایلیده تیکیلمیش شهرک‌لری له تاریخی سو کانال‌لاری‌نین عکیس‌لری
پارک‌لارینا چوخ فخر ائلرلر آمستئردام`ین. آشاغیدا شاغفاتی پارک (Sarphatipark)دان گؤزل عکیس‌لر.
پارکدا چیمن‌لره أل دگمه‌دیک‌لری چوخ گؤزه گلیردی. طبیعی حالتینده ساخلاماقی ایسته‌میشدیلر. آغاج‌لاری دا طبیعی ایدی‌لر مثلا آشاغیدا یاخجی دا بار گتیرن بیر فیندیقی گؤره بیلرسیز.
اوروپا تاریخی‌نین شهری دیر ده آمستئردام. اونا گؤره ده، بیز دامداش‌لاری چوخ دیر.
آدلی نقاش‌لاریندان بیریسی وینسئنت فان قوخ (Vincent van Gogh)-ون دا موزه‌سی گؤزل بیر یئر ایدی. آنجاق، موزه ایچینده عکیس سالینمادیغی اوچون هنده‌ورینده‌کی دامداش‌لار لا آچیقلیقدان عکیس سالدیم.
ایشین دیبینده، طیاره مئیدانیندا دا تاماشایا قویولموش بیر طیاره‌یه توش گلنده تئز مینیب ماتاهیمی سوودوم؛ ائله‌بیل هوللندلی شیرکت، فوکئر`ینکی ایدی.
هوتئله قاییداندا هاوا دولموشدو. ایستاسیوندا دمیر یولون قیراقیندا کی لالالار دیققتیمی چکدی.
گون‌لرین بیرینده آمستئردام بیلیوردونا گئتمیشدیم. بو بیلیورد واندئروالس (Johannes Diderik van der Waals)-ین ایشلدیگی یئر دیر. دهلیزلرین بیرینده موزه کیمی بیر یئر دوزلدیب کئچمیشدن قالان بعضی شئی-شوی‌لری قویموشدولار. او سرگییه باخیب کیتابخانانی دولاناندا اطلس‌لر بؤلومونده کوروش علائی`نین کیتابنی توش گلدیم: General Maps of Persia (1477-1925). او آندا ناصر منظوری`نین «آذ»دا ایشاره ائله‌دیگی نیشابور شهری‌نین ایران اولدوقو یادیما توشدو. اونا گؤره ده، آچیب نقشه‌نی تاپماقا چالیشدیم. او نقشه‌نی تاپاناجان بیر نئچه شئیی ده اؤیرندیم. کیتابی یازان جناب اینگیلیستانلی نقشه کولئکسیونئری بیر موهندیس دیر. احسان یارشاطر له اوتورب دوران‌لاردان ایمیش. نقشه‌لره باخارکن گؤردوم کی کیتابا قویولموش نقشه‌لرده اوزون زامان اوستونده قیرغین چیخان عرب/فارس خلیجی داعواسی دا وار دیر. وئنئدیک‌لی‌لر، هولندلی‌لر له یونانلی‌لارین چکدیک‌لری بو نقشه‌لرده خلیج چوخ زامان پرس آدی لا آدلاندیریلسا دا عرب آدی دا آز کئچمه‌ییبدیر. بونلاردان سووای، داعوانین ایکی طرفی‌نین ده اوستونو اؤرتدوگو بیر آد دا قطیف/بصره خلیجی دیر.
سونوندا نقشه‌نی تاپدیم. «آذ»دا وئریلن نقشه‌لرین بیره‌بیر عئینیسی اولماسا دا ۱۷۴۰-دا آمستئردام`دا De l`Isle ألیندن چیخان Tabula Nova Imperii Turcarum, Arabum et Persarum باشلیقلی نقشه‌ده ده Nichapur eu Iran یازار.
ندا`نین سالدیغی عکیس‌لردن سئچیلمیش‌لر.
