کئچن گونلرین بیرینده صابانجی بیلیورد'دا ائراسموس'ا گلن آلمانلی اؤیرنجیلردن دانیشیردیق. اونلار ایمتاحانا چوخ راحات گلیب چوخ راحات دا لاپ یاخجی نومرهلری آلاردیلار آما تورکییهلی اوشاقلار بیر معمولی نومره آلماق اوچون او درسده ایکیز دوغاردیلار. بیز ده بئله ایدیک؛ ایندی ده بئله ایک. بونلار فیکیرلشرکن دانیشدیق کی نییه اونلارا او قدر راحات گلیر بیر ایمتاحان آما بیزه ائله او ایمتاحان داغ کیمی گلیر. من دئدیم کی «اونلارین ایجتیماعی تجروبهلری بیزدن چوخ اولدوقو اوچون بیز نن بیر نوقطهدن باشلامیرلار. اونلار بیزدن قاباقدا موسابیقهنی باشلاییرلار.»
بیر گون دوکتورا جامع ایمتاحانیدا توشدوم (اوچ باشلیقدان کئچیب بیر باشلیقدا توشموشدوم). او گون بیلدیم کی بیزیم باشیمیزا گلنلر نه قدر چوخ اولورلار بیر ایمتاحاندان کئچمهدیگیمیز زامان. حالبوکی، اونلارین باشینا بو قدر ده ایش گلمز.
جامع ایمتاحاندان _بیر قوندارما قانونا گؤره_ ایکینجی سفرده کئچنمهین دوکتورا اؤیرنجیلرینین گرک دوکتورالارینا سون وئریلسین؛ ایخراج اولورسوز تورکوسو. بو قانون بیزیم بیلیوردا قبول اولما و آد-یازدیرمامیزدان ایکی ایل سونرا قویولدو آما دئدیلر کی کئچن ایللردن قالانلارا دا شامیل اولاجاق. ایلک ایسترئس اوردان باشلادی. بو قانونو قویان آدام یا هیآت حقوقدان و قانوندان اینتروداکشن سطحینده بئله بیلمیر: قانون کئچدیک واقعهلره قویولماز (قانون عطف به ما سبق اولماز). قانون، قویولدوقو گوندن سونرایا کئچرلی دیر. بو هیآت یؤک دیر کی اؤز ماجراسی وار. تورکییه'ده نه یازیق کی بئله ایشلر چوخ وار؛ سیاستینده ده، حقوقوندا دا، حیاتیندا دا.
الغرض، آز قالیردیم ایخراج اولام. اولسایدیم گرگ ایکی هفته ایچینده تورکییهدن چیخئیدیم. هارا گئدهجکدیم؟ طبیعتا ایران'ا. موستقیم سرباز گئتمهلی ایدیم. دئییرسیز به ائله بو راحتلیقدا دی؟! خانیم دئمهسه ده ائشیتدیردی: «اؤلسن، قالاسان، من قاییتمارام او خارابایا.» ایندی من نئینییهجکدیم؟ بیر ایمتاحاندان اؤترو عائیلهم داغیلاجاق.
دئنن کی قاییدماییب بوردا بیر ایش تاپاجاقدیم (غوربت مملکتده بو بئیله بئکار نان، اوچ یاریم میلیون آوارا سورییهلی نن تاپا بیلسم). اوندا سرباز-فراری اولاجاقدیم. وثیقه قویدوغوم ددهمین ۱۵ میلیون تومنی گئدهجکدی کی هئچ، مملکته ده گیرمک قداغان اولاجاقدی. اولانمازدی کی! آللاه گؤرستمهسین، دده دیر ننه دیر بلکه بیر گون حالی یاوالاندی. اوندا گئتمهیهجکدیم گؤرم بیلهلرینی؟ اینصاف دئیلدی. بو ایمتاحاندان اؤترو دده-ننهمه، قارداشلاریما تامارزی اولاجاقدیم.
بو ایمتاحاندان توشسئیدیم حیاتیم دگیشهجکدی. هر ایکی باشدان فلاکت گلهجکدی. دئییرسیز به ایندی کی توشمهمیشم، اوستادلارین صلاح گؤردوگو اوچون، هر شئی یولونا گلیب؟ یوخ! گئنه ده سربازلیق یئرینده، ۱۵ میلیون یئرینده، قاچاقلیق یئرینده، خانیمین موخالیفتی یئرینده. بو تصمیمی فقط بیر ایل دالا آتدیق. یئنگیده گئنه بو قییامت قوپاجاقدیر. فرقی بو اولاجاق کی اوندا دوکتورا مدرکیم اینشاللاه ألیمده اولا اولا آچمازدا قالاجاقام. او دیر کی بیزه بیر ایمتاحان داغ دیر آلمانلییا اؤیرنمگین بیر گونو. من ایمتاحاندان توشسم گرک یا بوشانام گئدم شهریمده بئکارلارا ایش دوزلدم (کئشکه گؤره بیلسم) یا دا وثیقهم نن دده-ننهمی، کندیمی، قارداشلاریمی گؤرمگی ألدن وئرم. آلمانلی اؤیرنجی، آنجاق، بو ایمتاحاندان کئچمهسه، دوکتوراسی سونلاندیریلسا بئله، گئدیب اوروپانین لاپ ثروتلی و ایشی-بول مملکتینده بیر ایش تاپاجاقدیر. اونا گؤره ده، او، درسی درس اوچون، عئلمده بیر ایش گؤرمک اوچون، گؤیلو او لحظه چکدیگی موضوعنو اؤیرنمک، تحقیق ائلهمک اوچون اوخویار من چؤرک اوچون.